Heb 12 | BOJ | STEP | Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom.

Hebrews 12

Iga Yesus koqyoqnsimqa a qa gago areqalo siŋgilatoqnqom

1 Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom. 2 Osim iga Yesus koqyoqnqom. Iga Qotei qa gago areqalo siŋgilateqnum kumbra di agi Yesus a segi utru. Bunuqna a na gago kumbra di torei keretqas. Yesus a qalie, a Qotei aqa anjam geregere dauryosim ŋamburbasq di moiqas di bunuqna a olo ŋambile bole osim tulaŋ areboleboleiyqas. A deqa are qalsiq siŋgilaosiq ŋamburbasq di moiej. A nami qalieej, a ŋamburbasq di moiqas di tamo uŋgasari naŋgi a qa maroqnqab, “A tamo tulaŋ uge deqa a moiqo.” Yim a jemakobaiyqas. Ariya Yesus a jemai deqa are qalosai. A Qotei aqa anjam dauryosiq moiej. Ariya bini a olo laŋ qureq dia Qotei aqa awo jaram baŋ woq di awejunu.

Qotei na gago kumbra tingitetgwa marsiq deqa iga gulube egeqnu

3 Niŋgi geregere are qaliye. Une tamo naŋgi Yesus qa tulaŋ ugeoqnsib a jeutoqneb. Ariya a deqa ulaosai. A siŋgila na tigelesoqnej. Niŋgi deqa are qaloqnsib gulube nuŋgoq boqnimqa siŋgila na tigelesoqniye. Niŋgi ulaosib asgiŋgaiq. 4 Bole, niŋgi siŋgila na qotoqnsib une gotraŋyeqnub. Ariya nuŋgo kumbra dena jeu tamo naŋgi na niŋgi moiotŋgosaieqnub. 5 Nami Qotei a nuŋgo are siŋgilatetŋgwa osiqa niŋgi anjam endegsi merŋgej, “O ijo aŋgro, e nuŋgo Tamo Koba. Deqa e na nuŋgo kumbra tingitetŋgwa marsiyqa gulube eŋgoqnit niŋgi gulube di qoboiyqa asgiŋgaiq. Osib are gulubeiŋgaiq. Niŋgi quiye. Tamo naŋgi e na qalaqalainjreqnum qaji naŋgi di e na olo tingitnjreqnum. Tamo naŋgi ijo segi aŋgro qa mareqnum qaji naŋgi e na gulube enjreqnum.” Qotei a na niŋgi aqa segi aŋgro sqa marsiqa anjam degsi merŋgej. Niŋgi anjam deqa olo are walŋgwo kio?

7 O was qu, Qotei na niŋgi tingitŋgoqnimqa niŋgi siŋgila na tigeloqnsib gulube di qoboiyoqniye. Abu naŋgi na naŋgo aŋgro naŋgi gaigai tingitnjreqnub dego kere Qotei na niŋgi dego tingitŋgeqnu. 8 Qotei na aqa aŋgro kalil naŋgi gaigai tingitnjreqnu. A na niŋgi tingitŋgwasai di niŋgi aqa aŋgro tiŋtiŋ sai deqa. Niŋgi gam qaji uŋa aqa aŋgro bul deqa. 9 Niŋgi are qaliye. Gago mandam qaji abu naŋgi na iga tingitgoqneb. Deqa iga naŋgo ñam soqtoqnem. Ariya gago laŋ qaji Abu a gago qunuŋ taqateqnu. Deqa iga aqa sorgomq di sosim aqa ñam soqtoqnqom. Osim deqa iga ŋambile gaigai sqom. 10 Gago mandam qaji abu naŋgi sokiñala sosib naŋgo segi areqalo dauryosib iga tingitgoqneb. Ariya Qotei a na iga tulaŋ aqaryaigwajqa deqa marsiq iga tingitgeqnu. Yim iga aqa segi kumbra boleq di sqajqa deqa. 11 Bole, Qotei na iga tingitgwa maroqnsiq gulube egeqnaqa dena iga areboleboleigosaieqnu. Iga dena are gulubeigeqnu. Ariya bunuqna gulube dena iga tingitgimqa iga kumbra bole dauryqajqa geregere qalieosim siŋgilaqom. Osim deqa iga are lawo na sqom.

Niŋgi geregere ŋam atsib siŋgila na tigelesoqniye

12 Deqa nuŋgo baŋ a siŋgila saiqoji sosim laesqas di niŋgi na olo siŋgilatosib wauoqniye. Nuŋgo siŋga dego laesqas di niŋgi olo siŋgila na tigelesoqniye. 13 Tigelesosib gam bole dauryosib walweloqniye. Niŋgi degyqab di nuŋgo siŋga ugeqasai. Nuŋgo siŋga olo boleqas.

14 Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai. 15 Niŋgi geregere ŋam atsib soqniye. Qotei a niŋgi qa are tulaŋ boleiyeqnu aqa kumbra di niŋgi qudei olo uloŋosib urato uge. Ŋamtaŋ oqsiq gei uge ateleŋeqnu dego kere nuŋgo ambleq di tamo bei a kumbra uge uge babtoqnimqa niŋgi na saidyiye. Tamo dena niŋgi gulube eŋgimqa niŋgi Qotei aqa ŋamgalaq di jiga ti so uge. 16 Niŋgi na tamo naŋgi saidnjribqa naŋgi sambala kumbra yaib. Osib tamo naŋgi Qotei qoreiyqajqa dego saidnjriye. Agi nami Iso na Qotei qoreiyosiqa a aŋgro matu soqnej deqa are qalosaiosiq iŋgi bole kalil aqa abu na nami a yqajqa minjej qaji di bati qujai qa qariŋyosiq dena iŋgi awaiyosiq uyej. 17 Niŋgi qalie, Iso a bunuqna aqa abu aqa iŋgi iŋgi di olo oqajqa marnaqa Qotei na a saidyej. Deqa a akamugetej. Ariya aqa kumbra yej qaji di a olo uratosim are bulyqajqa gam saiiyej.

Niŋgi Jerusalem bunuj laŋ goge di unu qaji deq beleŋeb

18 Nami Israel naŋgi Sainai mana utru jojomyosib dia ŋamyuo ti ambru ti jagwa ti unoqneb. Naŋgo baŋ na mana di ojoqneb. Ariya was qu, niŋgi iŋgi iŋgi deq bosai. 19 Manaq dia Israel naŋgi gul anjam quoqnsib Qotei aqa kakoro dego quoqneb. Osib ulaugeteb. Deqa naŋgi Moses minjeb, “Qotei a olo anjam bei mergaiq.” 20 Naŋgi Qotei aqa anjam di qusib ulaugeteb. Agi Qotei na naŋgi endegsi minjrej, “Tamo bei kio wagme bei kio mana endeq oqimqa niŋgi a meniŋ na qalib moiem.” Qotei na naŋgi degsi minjrej. 21 Manaq dia naŋgi iŋgi iŋgi di unsib deqa naŋgi tulaŋ ulaugeteb. Moses a segi dego mana deqa ulaosiq marej, “E segi ulaugetosim tulaŋ ginda gindaŋeqnum.”

22 Ariya niŋgi iŋgi iŋgi deq bosai. Niŋgi Saion manaq beleŋeb. Osib Qotei ŋambile unu qaji aqa segi qureq dego beleŋeb. Qure di agi Jerusalem bunuj laŋ goge di unu qaji. Niŋgi laŋ aŋgro tulaŋ gargekoba sisiyqa keresai naŋgi qa dego beleŋeb. 23 Tamo naŋgi Qotei qa korooqnsib loueqnub qaji naŋgi qa dego niŋgi beleŋeb. Tamo naŋgi di Qotei aqa segi aŋgro matu tiŋtiŋ. Naŋgo ñam agi Qotei a laŋ qureq dia neŋgreŋyej unu. Niŋgi Qotei qa ti tamo naŋgi Qotei aqa segi kumbra tiŋtiŋ dauryeqnub qaji naŋgo qunuŋ qa ti beleŋeb. Tamo naŋgi di Qotei na une saiqoji qa minjrej deqa naŋgi tulaŋ bole unub. Niŋgi Qotei agi mondoŋ tamo uŋgasari kalil naŋgo une qa peginjrqas qaji a qa beleŋeb. 24 Ariya niŋgi Yesus qa dego beleŋeb. Yesus agi Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Yesus aqa leŋ agi bileŋej qaji a qa dego niŋgi beleŋeb. Deqa bini leŋ dena niŋgi Qotei aqa anjam merŋgobuleqnu. Yesus aqa leŋ di tulaŋ bolequja. Deqa leŋ dena Abel aqa leŋ tulaŋ buŋyejunu. Anjam Abel aqa leŋ na iga mergobuleqnu qaji Qotei aqa anjam de ti keresai.

Qotei na niŋgi anjam merŋgoqnimqa niŋgi aqa anjam quqwa uratoqnaib

25 O was qu, niŋgi geregere ŋam atiye. Qotei na niŋgi anjam merŋgoqnimqa niŋgi aqa anjam quqwa urato uge. Qotei a nami mandamq endi sosiqa Israel naŋgi anjam siŋgila na minjreqnaqa naŋgi quqwa uratoqneb. Deqa Qotei na naŋgi awai uge enjrej. Awai uge di naŋgi uratnjrqa keresai. Ariya bini Qotei a laŋ goge di sosiqa iga dego anjam siŋgila na mergeqnu. Deqa iga a qoreiyqom di a na iga awai tulaŋ ugedamu egwas. Awai uge di iga uratgwa keresai. 26 Nami Qotei na Israel naŋgi anjam siŋgila na minjrnaqa aqa kakoro dena mandam reŋgiŋyej. Ariya bini a olo anjam endegsi iga mergeqnu, “Bunuqna bati qujai qa e olo mandam reŋgiŋyqai. Ariya e mandam segi reŋgiŋyqasai. E mandam ti laŋ ti ombla na reŋgiŋnjrqai.” 27 A marej, “Bati qujai qa.” Deqa iga qalieonum, Qotei a mandam ti laŋ ti reŋgiŋnjrsimqa ariya iŋgi iŋgi kalil a nami atej qaji di taqal breinjrim naŋgi torei koboqab. Yim deqa iŋgi iŋgi a na reŋgiŋnjrqasai qaji di gaigai sqas.

28 Qotei a gago Mandor Koba sosiq iga taqatgeqnu. Iŋgi iŋgi kalil a na iga egej qaji di reŋgiŋqasai. Deqa iga Qotei biŋiyoqnsim kumbra a tulaŋ areareteqnu qaji dena a qa louoqnsim aqa ñam soqtoqnsim a qa ulaoqnsim aqa sorgomq di sqom. 29 Iga degyqom. Di kiyaqa? Ŋamyuo na iŋgi iŋgi kalil koiteleŋeqnu dego kere gago Qotei a na tamo uŋgasari naŋgo une qa peginjrsim naŋgi tulaŋ padaltnjrougetqas.